Иртнĕ çулла Вăрнарти Севернăй тăкăрлăкри 6-мĕш тата 6-мĕш А çуртсем умĕнче хитре спорт площадкисем уçрĕç. Территорие хăтлăх кĕртрĕç. Тротуарсем анлă, çÿреме меллĕ. Ун тăршшĕпех, пур еннелле каякан утма çул хĕррипех, илемлĕ çÿп-çап контейнерĕсем вырнаçтарчĕç.

Анчах та хăшпĕр çынсен хăтланăвĕ ытла та тĕлĕнтерет. Малтанах хăшпĕрисем вĕсене çавăра-çавăра тăккаларĕç. Анчах çулталăк вĕçĕнче 7-мĕш садик çывăхĕнчи тротуар кĕтессинчи контейнера çĕмĕрчĕç. Ăна авса, хуçлатса пайланă.

Нумаях пулмасть вара тата тепĕр контейнера аркатнă. Ăшне тем персе сирпĕтнĕнех туйăнать. Тĕпĕ тухса ÿкнĕ. Тавралла вара çÿп-çапĕ тăкăнса йăванать.

Темшĕн-çке туса панине упрама пĕлместпĕр. Кама кансĕрленĕ-ши çак контейнерсем...

Светлана ЧИКМЯКОВА