Пĕлтĕр Чăваш енре пурăнакансем банксенче виçĕмçулхинчен ытларах укçа-тенкĕ упранă. Финанс министерствин информацийĕ тăрăх, кăçалхи январĕн 1-мĕшĕ тĕлне республикăри банксенче уçнă вкладсемпе ытти счетсем çинче ?эскроу счечĕсемсĕр пуçне% пĕтĕмĕшле 355 млрд тенкĕ тытнă. Ку кăтарту иртнĕ çул пуçламăшĕнчен 20,7 процент нумайрах.

- Депозитсен пысăк ставкисем перекетри укçа-тенке инфляцирен хÿтĕлеççĕ. Вкладсене вара 1,4 млн тенкĕ таран патшалăх страхлать. Хăшпĕр тĕслĕхсенче страхлав саплаштарăвĕн виçи ытларах та пулма пултарать. Сăмахран, 2,8 млн тенкĕ таран - вăрах вăхăтлăх, илмелли мар вкладсемпе, 10 млн тенкĕччен - укçа эскроу счечĕ çинче куçман пурлăх туянма упранать пулсан, - ăнлантарать Наци банкĕн республикăри уйрăмĕн управляющийĕ Максим Фролов.

Сăмах май, сахал тупăшлă çынсем, патшалăх пособийĕсене илекенсем, пĕлтĕрхи июльтен пысăк банксенче социаллă вкладсемпе счетсем уçма пултараççĕ. Вĕсен процент ставки - пĕр уйăхран пуçласа çулталăк таран депозитсенчен чи пысăкки. Ку тивĕçтерĕве «Госуслугинчи» Харпăр хăй кабинечĕ урлă та илме пулать.

Ирина ПЕТРОВА