Пыл шывĕ - пылпа ăшă шыва хутăштарнă напиток. Ăна выç хырăмла ĕçме сĕнеççĕ. Пыл шывĕ начарланма, вар-хырăм ĕçне йĕркелеме, лайăх çывăрма, организма çамрăклатма тата иммунитета çирĕплетме пулăшать.

Ку напиток усăллă тата сиплĕ пултăр тесен çакна асра тытмалла:

чăн-чăн, шанчăклă пылпа çеç усă курăр, унта ытти хутăшсем пулмалла мар,

шыва 37 градус таран ăшăтмалла, çăлкуçран е ятарласа тасатнине илмелле,

200 мл шыв çине 30 г пыл ярсан çителĕклĕ,

напитока апат çийиччен çур сехет маларах ĕçмелле,

пыл шывне ĕçес умĕн хатĕрлемелле, холодильникре упрама юрамасть, сиплĕ пахалăхĕсем çухалаççĕ.

Пыл çине аллерги пур пулсан, гипертонипе, вар-хырăм пăсăлнипе аптрасан, апат-çимĕçпе наркăмăшлансан пылак шыва ĕçме юрамасть. Пĕрремĕш хут тутаннă чухне те асăрхануллă пулмалла, организм хăйне мĕнле туйнине сăнамалла.