Чăваш енри 70 ача Беларуç Республикинче экскурсире пулнă. Çак вĕренекенсем çамрăк ăрăва патриотла воспитани парассипе йĕркеленĕ мероприятисенче хастарлăх кăтартнă ачасем.

Пĕлтĕр те вĕрентÿ учрежденийĕсенче ăс пухакансен пĕр ушкăнĕ тăванла республикăри астăвăм вырăнĕсене çитсе курнăччĕ.

Палăртмалла, экскурси маршрутне пĕлтерĕшлĕ объектсене - Минскри Çĕнтерÿ музейне, Брест крепоçне, «Беловежская пуща» наци паркне, авалхи халăх ремеслисен тата технологисен «Дудутки» музей комплексне кĕртнĕ.

Халăхсен Пĕрлĕхĕн çулталăкĕнче чăваш тата беларуç ачисем историне тĕпчени, туслăха çирĕплетни савăнтарать.