Малашне КТ, МРТ, УЗИ, ангиографи тата маммографи снимокĕсем Медицина ÿкерчĕкĕсен тĕп архивĕнче упранĕç. Пĕрлехи базăна 527 пине яхăн протокол пухнă та ĕнтĕ. Кун çинчен Чăваш ен Сывлăх сыхлавĕн министерстви пĕлтерет.

Тĕп шухăшĕ - пациентсемпе тухтăрсен пурнăçне ансатлатасси. Малашне снимоксене пĕр больницăран теприне йăтса çÿреме тивмĕ: вĕсене тухтăрсем электронлă майпа курма пултарĕç. Сăмахран, район больницинчи тĕпчеве тÿрех республикăри специалистсем патне консультаци валли яма май килĕ.

Малашлăхра системăна искусствăлла интеллектпа çыхăнтарĕç - çакă тухтăрсене паталогисене хăвăртрах тупса палăртма тата диагностикăн малтанхи тапхăрĕнчи йăнăшсене чакарма май парĕ.