Геннадий КАЗЫКИН,

полицин «Вурнарский» пайĕн патшалăх автоинспекци уйрăмĕн пуçлăхĕ:

- Июль уйăхĕнче професси уявĕсен черетне яланхиллех Çул-йĕр хăрушсăрлăхĕн патшалăх инспекцийĕн кунĕ уçать. Кăçал уяв сумĕ тата та пысăкрах - ку служба хăйĕн 90 çулхи юбилейне паллă тăвать. Патшалăх автоинспекцийĕн «çуралнă кунĕ» вара 1936 çулхи июлĕн 3-мĕшĕ - шăпах çак кун СССР Халăх Комиссарĕсен Канашĕ çулсем çинчи хăрушсăрлăха тивĕçтерессипе тимлекен тытăм çинчен Положение йышăннă.

90 çулхи тапхăрта служба çулсеренех çĕнелсе-çирĕпленсе пынă, ансат мар аталану çулĕ витĕр тухнă. Паян Патшалăх автоинспекцийĕ - çĕнĕ йышши оборудованипе, çĕнĕ ĕç мелĕсемпе усă куракан пысăк технологиллĕ служба. Ĕçре пулăшу - «Ăслă камерăсем», цифра сервисĕсем, йĕркене пăснине асăрхакан тĕрлĕрен приборсемпе тата çыхăну системисемпе, навигаторсемпе тивĕçтернĕ патруль машинисем...

Апла пулин те унăн тĕп задачи кирек хăçан та çулсем çинче аварийлĕ лару-тăрусене асăрхаттарасси тата пурте çул-йĕр правилисене пăхăннине çирĕп тĕрĕслесе тăрасси пулнă. Çак тĕллеве хальхи сотрудниксем те тÿрĕ кăмăлпа, пĕтĕм яваплăха ăнланса пурнăçласа пыраççĕ. Кашниех хăйсен тивĕçĕсене пысăк профессионализмпа, гражданла яваплăхпа пурнăçлаççĕ.

Службăн юбилейлă дати - нумай çул çул-йĕр хуралне панă, халĕ çамрăк сотрудниксене пулăшса-вĕрентсе пыракан ветерансене те аса илме, вĕсен ячĕпе ăшă сăмахсем калама ăнăçлă сăлтав. Вĕсене паян та стройра пулнишĕн, профилактика ĕçне те хастар хутшăннишĕн уйрăм тав.

Çул-йĕр хăрушсăрлăхĕн патшалăх инспекцийĕн кунĕ ячĕпе мĕнпур сотрудниксене, ветерансене, вĕсен çемйисене пĕтĕм чунтан саламлатăп. Çирĕп сывлăх, çемйĕрсенче телейпе килĕшÿ, пирĕн çăмăл мар службăра çирĕплĕхпе чăтăмлăх, ăнăçу сунатăп!