Округра ырă улшăнусем малаллах тăсăлаççĕ. «Ниме - халăх бюджечĕ» прог-рамма йĕркипе мĕнпур тăрăхра территорисене хăтлăлатассипе хĕрÿ ĕç пырать. Чылай ялта халăх сĕнĕвĕсемпе çуралнă проектсене пурнăçа кĕртессипе тимлеççĕ.

Мăньял Хапăс ялĕнче, акă, Овражная урамри çулăн юсавĕ вĕçленнĕ. «Ниме - халăх бюджечĕ» программăна хутшăнса ĕнтĕ ăна вĕт чул сарса хытарнă. Унччен кĕрсе çÿреме кансĕр пулнă, йĕпе-сапара çăрăлнă çул халĕ ял çыннисемшĕн те, транспортшăн та меллĕрех. Ку ырă улшăну шăпах кунта пурăнакансем хăйсем пуçарупа тухнипе, ăна пурнăçа кĕртме хăйсем тăрăшнипе, çавна май республика бюджетĕнчен укçа-тенкĕ пулăшăвне тивĕçнипе пурнăçланма пултарнă.

Упнер территори пайĕнче пурăнакансем те хастар. Вĕсем те хăйсен шухăшĕ-ĕмĕчĕсене пурнăçа кĕртессипе тимлеççĕ. Акă, тăватă ял халăхĕ сăваплă вырăна - масар таврашне - хăтлăлатма йышăннă. Кунта пурнăçран уйрăлнă çывăх çыннисем, тăванĕсем юлашки канăç тупнă вырăн пулнă май, ăна тирпейлĕ тытассине кашнин тивĕçĕ тесе шутлаççĕ вĕсем.

Хăтлăх мероприятийĕсем шучĕпе кунта пысăк ĕçсем туса ирттернĕ - масар çурчĕ, карти-хапхи, çырма урлă икĕ кĕпер, тротуар, çÿп-çап урнисем тата ытти.

«Ниме - халăх бюджечĕ» программа яр уççăн кăтартать - пĕрлехи вăйпа кирек мĕнле ĕç те ăнăçать.

Ирина ЯКОВЛЕВА