Чăваш енре патшалăх тата парти ĕçченĕ Илья Прокопьев çуралнăранпа 100 çул çитнине паллă тума хатĕрленеççĕ. Тĕп мероприятисем утă уйăхĕн 29-мĕшĕнче иртĕç.

Илья Павлович Чăваш ене 15 çула яхăн ертсе пынă. Вăл Вăрнар районĕнчи Мачамăш ялĕнче 1926 çулхи утă уйăхĕн 29-мĕшĕнче çуралнă. Тăван çĕршывăн Аслă вăрçине тата совет-яппун вăрçине хутшăннă. 1974-1988 çулсенче Илья Павлович КПСС Чăваш обкомĕн пĕрремĕш секретарĕ пулнă. Унăн ячĕпе Шупашкар ГЭС-ĕн, трактор завочĕн, «Куç микрохирургийĕн» строительствисем çыхăннă. Илья Прокопьев 2017 çулхи нарăсăн 20-мĕшĕнче пурнăçран уйрăлнă.

Утă уйăхĕн 29-мĕшĕнче Шупашкарти Наци вулавăшĕ умĕнче Илья Прокопьевăн пурнăçĕпе ĕç-хĕлне халалланă ăслăлăхпа практика конференцийĕ иртĕ. Çавăнтах курав ĕçлĕ. Богдан Хмельницкий урамĕнчи 1-мĕш масар çинче Илья Прокопьевăн палăкĕ патне чечексем хурĕç. «Çĕнĕ хула» микрорайонта, ун ячĕпе хисепленекен урамра, мероприятисем иртĕç.

Тĕплĕнрех - çитес номерте.