Нумаях пулмасть Вăрнарти тĕп больницăра «Сывлăх пуйăсĕ» - «Ача-пăча тухтăрĕ» ятпа калăпăшлă профилактика акцийĕ иртрĕ. Палăртмалла, ку акци Чăваш ен Пуçлăхĕн Олег Николаевăн пуçарăвĕн пĕр пайĕ шутланать.

Профилактика мероприятийĕ сывлăх уявне çаврăнчĕ. Çула çитмен пациентсене тата ашшĕ-амăшне юмах персонажĕ хапăлласа кĕтсе илчĕ. Шур халатлă ĕçченсен йышĕнче Шупашкарти сиплев учрежденийĕсенчи тухтăрсем - хирург, стоматолог, невролог, оториноларинголог, гинеколог, дерматолог, офтальмолог, эндокринолог, ультрасасă диагностикин врачĕ - пулчĕç. Вĕсем акцие хутшăннă 213 çамрăк пациента пур енлĕн тĕрĕслерĕç. Тухтăрсем кĕçĕннисене тарават йышăнчĕç, сĕнÿ-канаш пачĕç. 19 ачанне малтан палăрман чир-чĕре тупнă. Çамрăк пациентсен тĕп хулари клиникăсенче сипленмелле.

Чăн та, профилактика тĕрĕслевĕсен пĕлтерĕшĕ пысăк. Ÿсекен ăру вăхăтра тĕрĕсленнине мĕн çиттĕр/ Вĕсенче - пуласлăх.

- Шупашкара каймасăрах ăста квалификациллĕ медицина пулăшăвне илме май пурришĕн, çакăн пек пĕлтерĕшлĕ те усăллă акцие йĕркеленĕшĕн эпир, ашшĕ-амăшĕ, питĕ хĕпĕртерĕмĕр, - пĕлтерчĕ Людмила Ильина.

Елена ГРИГОРЬЕВА