«Волна» ача-пăча сывлăх лагерĕн территорийĕнче республикăри çамрăк экологсен слечĕ иртрĕ. Унта район чысне Пăртас шкулĕнче вĕренекенсем – «Экодозор» экологи пĕрлешĕвĕн членĕсем хÿтĕлерĕç.

Виçĕ кун хушшинче çамрăк экологсем тĕрлĕ конкурса хутшăнчĕç: экологин тĕрĕслевĕпе турист маршрутне чупса тухрĕç, экологи сукмакĕпе экскурси йĕркелесе ирттерчĕç, стена хаçачĕ кăларчĕç тата ытти ĕçсене пурнăçларĕç.

«Экодозор» вăрманпа тата улăх-çаранпа çыхăннă пĕлĕве лайăх кăтартса пачĕ. Команда 2-мĕш вырăна тухрĕ. Ку конкурсра В.Сергеева тата А.Ключникова тăрăшрĕç. Экологи турист маршрутĕнче те «Экодозор» 2-мĕш вырăн çĕнсе илчĕ. Кунта П.Кириллов, А.Егоров тата А.Никитин палăрчĕç. Пултарулăх конкурсĕнче – стена хаçачĕ  кăларассинче 1-мĕш вырăна тухрĕç. А.Галкина тата Г.Петрова хаçата пуринчен лайăх калăпларĕç.

Пăртассем спорт ăмăртăвĕнче те малта пулчĕç. П.Кириллов тăршшĕне сикессипе 1-мĕш вырăн йышăнчĕ. Çивĕч кĕрешÿре «Экодозор» 2-мĕш вырăна тухрĕ. Командăна ÿлĕмрен те ăнăçу сунас килет.

Татьяна ПЕТРОВА,

пĕрлешÿ ертÿçи.