Пĕтĕм Раççейри çăмăл атлетика федерацийĕ юбилейлă – 100-мĕш чемпионата Шупашкарта ирттерме йышăннă. Вăл июлĕн 24–27-мĕшĕсенче пулать.

Сумлă ăмăртăва харпăр хăй патĕнче ирттерессишĕн Шупашкарпа пĕрле Хусан та тупăшнă. Пĕтĕмлетÿллĕ сăмаха «Раççей – спорт çĕршывĕ» пĕтĕм тĕнчери форумра çирĕплетнĕ.

Каламалла, çăмăл атлетика енĕпе наци чемпионатне Чăваш ен çиччĕмĕш хут йышăнать. Юлашки çулсенче «Олимпийский» стадионта футбол енĕпе 2018 çулхи тĕнче чемпионатне хатĕрленсе футбол уйне кăна мар, чупу çулĕсемпе çăмăл атлетикăн пĕтĕм секторне çĕнетсе улăштарнă. Халĕ стадион пĕтĕм тĕнчери мĕнпур требованисене тивĕçтерет.