Республикăра «Золотая шайба» ăмăртăвăн вăййисем пыраççĕ. Унта Вăрнарти «Кристалл» команда та хастар хутшăнать, тĕслĕх кăтартать.
Иртнĕ эрнере, ак, 2012-2013 çулсенче çуралнисем финалта тупăшнă. Вăрнарсен «Кристалл» команди сахал йышпа пулин те çĕнтерÿçĕ пулса тăма пултарнă. Уйрăмах Егор Шашков лайăх вăйă кăтартнă. Виçĕ тĕлпулура кĕртнĕ вунпĕр шайбăран вуннăшĕ - унăн.
1-мĕш вырăншăн вăрнарсем Елчĕк округĕнчи «Яльчики» командăпа кĕрешнĕ.
Халĕ Вăрнар хоккеисчĕсем Раççей турнирне хутшăнма хатĕрленеççĕ. Республикăн пĕрлештернĕ командипе пĕрле унта Егор Шашков тата Александр Уткин хутшăнаççĕ.
Çавăн пекех ыран 2010-2011 çулсенче çуралнисем хушшинче пĕтĕмлетÿллĕ вăйăсем иртеççĕ.
