Патшалăх Канашне янă Çырăвĕнче Чăваш ен Пуçлăхĕ Олег Николаев уйрăммăн палăртнăччĕ: сывлăх сыхлавĕн тытăмĕн мĕнпур шайри инфраструктурине çĕнетесси кăçал та малалла тăсăлĕ. Пахалăхлă медицина пулăшăвĕ кÿрессине лайăхлатас тĕлĕшпе пирĕн округра та чылай çĕнетÿ пурнăçланмалла.

Уйкас Кипек ялĕнче, акă, пысăк ĕç пырать: строительсем модульлĕ фельдшерпа акушер пунктне çĕклеççĕ. Ку çурта паянхи технологисемпе тата материалсемпе усă курса хăпартаççĕ. Строительство ĕçĕсем «Вăрăм та хастар пурнăç» наци проекчĕн йĕркипе иртеççĕ. Хальхи вăхăтра, каламалла, ФАП ача-пăча сачĕн çуртĕнче вырнаçнă. Вăл паянхи требованисене тивĕçтермест.

Вăрнар район больницин тĕп врачĕ Сергей Илюткин палăртнă тăрăх, ФАП-сем уçма май тупни - округ центрĕнчен аякра пурăнакансемшĕн пĕлтерĕшлĕ пулăм. Ку ыйтăва тимлĕх уйăрнине кура ял çыннисен пахалăхлă медицина пулăшăвне вырăнтах илме майсем ÿсеççĕ. Çĕнĕрен çĕкленекен фельдшер пункчĕ çумне çирĕплетнĕ ялсем Вăрнартан 25-27 километр инçерех. Вĕсенче 300 енне çын пурăнать. ФАП-ра вара хальхи стандартсене тивĕçтерекен условисем пулĕç: процедурăсем ирттермелли, çынсене йышăнмалли кабинетсем, хевтесĕр çынсем валли санитари пÿлĕмĕ, йышăнăва кĕтсе лармалли хăтлă вырăн.

Каласа хăвармалла, кăçал пирĕн тăрăхра виçĕ медицина объектне хăпартма палăртаççĕ: икĕ модульлĕ ФАП-па пĕтĕмĕшле практика врачĕн пĕр офисне.

Хамăр инф.