Вăрнар округĕнче çурхи каникул вăхăтĕнче вĕрентÿ ĕçченĕсен спорт уявĕ иртнĕ. Чи вăйлă волейболистсен ятне çĕнсе илессишĕн 7 команда тупăшнă.

Турнира савăнăçлă лару-тăрура уçнă. Пĕтĕм Раççейри вĕрентÿ ĕçченĕсен профсоюзĕн округри организацийĕн председателĕ Елена Карпова, «Рассвет» спорт шкулĕн директорĕ Владимир Прокопьев ăмăртăва хутшăнакансене ăнăçу, çĕнтерÿ патне мĕнпур вăйран ăнтăлма суннă.

Пĕр минут иртнĕ-иртмен çивĕч кĕрешÿ пуçланнă. Кирек мĕнле ăмăртура чи маттуррисем çĕнтереççĕ. «Рассвет» спорт шкулĕн команди мала тухнă. Мăн Явăш шкулĕн команди иккĕмĕш вырăн çĕнсе илнĕ. Калининăсем - виççĕмĕшсем.

Призлă вырăнсене йышăннисене диплом, укçа-тенкĕ парса хавхалантарнă. Çĕнтерÿçĕ-командăна куçса çÿрекен Кубокпа та чысланă.

Турнирта хастарлăх кăтартакансем те наградăллă пулнă. Санарпуç тата Çĕрпел шкулĕсен командисем «Çĕнтерÿ патне ăнтăлнăшăн» диплома тивĕçнĕ.

Елена ГРИГОРЬЕВА