Хастарсем пулсан ял та аталанать. Çакна хамăр округри чылай тĕслĕхпе çирĕплетме пулать. Чылайăшĕ хăйсем пурăнакан вырăна тирпей-илем кĕртес, ун инфраструктурине çĕклес тесе пĕтĕм вăй-халне хываççĕ.

Ак, Чăрăшкас Мăратра пурăнакансем те активлăхпа палăраççĕ. Пĕве пĕтĕм ялшăн питех те кирлĕ объект пулнине ăнланса вĕсене тасатас енĕпе тимлеççĕ. Хальхинче Зеленăй урамра пурăнакансем пуçарулăх кăтартаççĕ. Юрий Марковăн, Алевтина Александрован тата Валерий Афанасьевăн çемйисем пĕр шухăшлăн çывăхри пĕвене йĕркене кĕртме тытăннă.

Халăхра ку вырăна Аркади пĕви теççĕ. Юлашки çулсенче вăл ушахлансах кайнă, шывĕ те типсе ларнăпа пĕрех. Çавăнпа та хастарсен ырă шухăш çуралнă та.

Çакăн пек çынсем пуррипе тăван тавралăх та илемленет, ял та сыхланса юлать.

Светлана ЧИКМЯКОВА