Çурла уйăхĕн 11-мĕшĕ – Чăваш еншĕн паллă пулăмпа çыхăннă. 1962 çулхи çав кун пирĕн ентеш Андриян Николаев космоса çĕкленнĕ.

Виççĕмĕш космонавт уçлăха тухнăранпа 57 çул çитнине халалласа Шуршăлти Космонавтика музейĕнче «Чăвашсен пĕрремĕш космонавчĕ» акци иртет. Çав кун музейре «Пĕртăван çăлтăрсем» курав уçăлĕ, кăсăклă экскурсисем ирттерĕç, чăваш кăйкăрĕ çинчен ÿкернĕ документлă фильмсем кăтартĕç...

2018 çултанпа музей çумĕнче шкул ачисен «Восток-3» радиостанцийĕ ĕçлет. Çурла уйăхĕн 11-мĕшĕнчен пуçласа авăн уйăхĕн 11-мĕшĕччен радиоçыхăну сеансĕсем ирттерĕç. Чăваш ачисем тĕнчери радиостанцисемпе калаçу йĕркелĕç.