Уй-хир ылтăнне ытарма çук, анчах та тыр-пула кĕлетсене кĕртме кăткăс. Йĕпе-сапаллă çанталăк вырма ĕçĕсене пурнăçлама чăрмантарать. Пĕлтĕр çак вăхăтра 38 комбайн ĕçленĕ-тĕк, халĕ чылай сахалрах – 16.

Уй-хир карапĕсем 4 предприятире – «Санары» агрофирмăра, аш-какай комбиначĕн хушма хуçалăхĕнче, «Агрохмель» агрофирмăра, Вера Дмитриева фермерăн хуçалăхĕнче – пĕрчĕллĕ культурăсене выраççĕ.

Район администрацийĕн ял хуçалăхĕпе экологи пайĕнчен пĕлтернĕ тăрăх, çурла уйăхĕн 5-мĕшĕ тĕлне аграрисем тĕштырăсене 224 гектартан пухса илнĕ, 803 тонна çапса тĕшĕленĕ. Вăтам тухăç 36 центнер.

Ыраш уйрăмах «Санары» агрофирмăра ăнса çитĕннĕ. Гектарти тухăçĕ – 47 центнер. Агрофирмăри хастар комбайнерсенчен пĕри – Олег Яковлев. Çулсеренех ĕçлĕ ăмăртусенче çĕнтерÿçĕсен йышĕнче. Кăçал вăл районта чи малтан тырă вырма тухнă.