Чăваш ен Пуçлăхĕн тивĕçĕсене вăхăтлăх пурнăçлакан Олег Николаевăн Указĕпе республикăра бассейнсене, фитнес-центрсене тата ытти спорт объектне ĕçлеме ирĕк параççĕ. Анчах та социаллă дистанцин уйрăм условийĕсене пăхăнма тивет. Спорт оборудованийĕсене пĕр-пĕринчен 1,5 метртан кая мар инçĕшĕнче вырнаçтармалла, пÿлĕмре пĕр çын пуçне 4 тăваткал метртан кая мар лаптăк тивĕçмелле.

Мунчапа саунăсен те ĕçлеме ирĕк пур. Вĕсен кану зонинче пĕр çын пуçне 1,5 тăваткал метр лаптăк пулмалла.

Обществăлла апатланăвăн стационарлă объекчĕсен вăхăтлăх верандисемпе террассисенче 20-рен ытла сĕтел тата сĕтел хушшинче 4 çынран ытла пулмалла мар.